Universitads e SPF
En Svizra datti dudesch scolas autas universitaras accreditadas tenor la Lescha federala davart l'agid a las scolas autas e davart la coordinaziun en il sectur da las scolas autas svizras (LASA): diesch universitads chantunalas e duas Scolas politecnicas federalas (SPF Turitg ed SPFL Losanna). Las scolas autas universitaras èn las scolas autas academicas tradiziunalas che fan en emprima lingia perscrutaziun da basa – cuntrari a las scolas autas spezialisadas cun lur perscrutaziun che s'orientescha oravant tut a l'applicaziun.
Las Universitads da Basilea, da Berna, da Lucerna, da Son Gagl e da Turitg sco er la Scola politecnica federala da Turitg (SPFT) sa chattan en la Svizra tudestga. Las Universitads da Genevra, da Losanna e da Neuchâtel sco er la Scola politecnica federala da Losanna (SPFL) èn domiciliadas en la Svizra franzosa. L'Universitad da Friburg sa chatta en il chantun biling Friburg (franzos e tudestg), l'Universitad da la Svizra taliana (USI) en il chantun italofon Tessin.
Las scolas autas universitaras porschan in vast spectrum da scolaziuns.
Cundiziuns d'admissiun
Studi da bachelor
Sco cundiziun per pudair cumenzar cun in studi da bachelor pretendan las universitads chantunalas e las Scolas politecnicas federalas (SPF) che la studenta u il student haja in attestat da maturitad gimnasiala u in attestat equivalent e ch'ella u el sappia la lingua da studi. La scola auta respectiva fixescha las cundiziuns d'admissiun concretas.
En Svizra èn – cun paucas excepziuns (studis da medischina, chiropratica, per part scienzas da sport) – tut ils studis accessibels libramain. Tar studis cun examens d'admissiun vegni fixà mintga onn sin basa dal dumber d'annunzias, sch'i han lieu examens d'admissiun. Pervia da la purschida limitada da plazzas da studi n'èn studentas e students da l'exteriur – cun excepziun da cas spezials – betg admess a quests studis.
Persunas che han in attestat federal da maturitad professiunala u da maturitad spezialisada e che han fatg cun success l'examen cumplementar tenor il reglament davart la passarella, vegnan medemamain admess a las scolas autas universitaras.
Differentas scolas autas universitaras enconuschan proceduras d'admissiun alternativas per persunas che n'adempleschan betg las cundiziuns d'admissiun menziunadas qua survart. Pretensiuns pon esser ina tscherta vegliadetgna, experientschas professiunalas ed in'annunzia en scrit sco er supplementarmain in examen da qualificaziun.
Studi da master
L'access ad in studi da master premetta in studi da bachelor terminà cun success. Il studi da master pon ins cumenzar a la medema u ad in'autra scola auta universitara. Da princip èsi er pussaivel da midar la direcziun da studi. Avant l'admissiun po la scola auta admettenta pretender che la studenta u il student s'acquistia ulteriuras enconuschientschas ed abilitads.
Per midar d'in auter tip da scola auta ad ina scola auta universitara ston vegnir ademplidas tschertas cundiziuns e prestaziuns supplementaras.
Doctorat
In studi da master absolvì cun success e l'adempliment d'ulteriuras cundiziuns garanteschan l'admissiun ad in studi da doctorat. L'admissiun è chaussa da la scola auta universitara. Sche la qualificaziun scientifica è suffizienta, èsi pussaivel da far in doctorat er cun in diplom da master d'in auter tip da scola auta.
Scolaziuns e diploms d'universitads
Studi da bachelor e da master
La furmaziun ha lieu tenor il model da studi da dus stgalims cun studis da bachelor e da master tenor la Decleraziun da Bologna.
Per il studi da bachelor èn necessaris 180 puncts dad ECTS. In studi a temp cumplain dura 3 onns. Per il studi da master dovri in studi a temp cumplain dad ulteriurs 1,5 fin 2 onns resp. 90 fin 120 puncts dad ECTS.
Designaziun e scursanida dals titels obtegnids
- Bachelor of Theology – B Th
- Master of Theology – M Th
- Bachelor of Law – B Law
- Master of Law – M Law
- Bachelor of Arts – B A
- Master of Arts – M A
- Bachelor of Science – B Sc
- Master of Science – M Sc
- Bachelor of Medicine – B Med
- Master of Medicine – M Med
- Bachelor of Dental Medicine – B Dent Med
- Master of Dental Medicine – M Dent Med
- Bachelor of Veterinary Medicine – B Vet Med
- Master of Veterinary Medicine – M Vet Med
Doctorat
In doctorat pretenda ina vasta lavur da perscrutaziun persunala. El prepara per in'activitad orientada a la perscrutaziun che po avair lieu en il champ universitar u extrauniversitar e qualifitgescha per surpigliar incumbensas e funcziuns professiunalas pretensiusas. Il titel da docter po vegnir concedì mo dad ina scola auta universitara. Cun il grad da docter obtegnan ins il titel dr. (…); a quest titel correspunda la translaziun englaisa PhD.
Furmaziun supplementara
Tar l'incumbensa da las scolas autas universitaras tutga – ultra da la scolaziun – er la furmaziun supplementara. Tut las scolas autas universitaras han posts da furmaziun supplementara ch'èn responsabels per la realisaziun da curs e da scolaziuns da furmaziun supplementara. Tar las scolaziuns da furmaziun supplementara tutgan ils studis da MAS, DAS e CAS. Las scolas autas universitaras dattan a las participantas ed als participants ils diploms correspundents (Master of Advanced Studies, Diploma of Advanced Studies, Certificate of Advanced Studies).
Onn academic
L'onn academic è dividì en dus semesters. Il semester d'atun cumenzan las occurrenzas d'instrucziun l'emna 38 e duran fin l'emna 51, il semester da primavaira cumenzan ellas l'emna 8 e fineschan l'emna 22. In semester dura 14 emnas.